Kangerlussuarmi anorthosisimik piiaavimmi Hudson Greenland A/S-ip qamutinik motoorilinnik eqqunneqarnerinut nalunaarsugaanngitsunik atuinera pillugu eqqartuussivilersuussinermi Nuna Advokater Nunatta Eqqartuussisuuneqarfianit illerneqarpoq.
Aatsitassarsiorfimmut misissuinerminni Akileraartarnermik Aqutsisoqarfiup paasivaa aatsitassarsiorfimmi qamutit motoorillit atorneqartut tamarmik eqqussinermut nalunaarsugaanngitsuusut. Tamatuma kingorna unnerluussisussaatitaasut qamutinik motoorilinnik eqqussinermut nalunaarsugaanngitsunik atuineq pillugu angallannermut inatsisinik unioqqutitsineraallutik Hudson Greenland A/S-imut eqqartuussivilersuussilerput.
Nunatta Eqqartuussisuuneqarfiata aalajangiineq atorlugu erseqqissarpaa sumiiffiup angallaviunera kisimi tunngavilersuutaasinnaanngitsoq, kisiannili sumiiffimmi pissutsit, aamma suliat angallannerullu qanoq ittuussusii, naapertorlugit aalajangersimasumik tamatigut nalilersuisoqartariaqartoq.
Suliami tassanerpiaq Nunatta Eqqartuussisuuteqarfianit oqimaalutaatigineqarput aatsitassarsiorfiup avinngarusimasumiinnera taamalu aqqusinernut nalinginnaasunut attuumassuteqannginnera, sulisut kisimik tamaani angallannerat, aatsitassarsiorfimmilu qamutit motoorillit sulinerinnarmut atorneqarnerat. Taamaammat sumiiffik nalinginnaasumik angallaffiunngitsutut isigineqarpoq, tamatumalu kingunerisaanik qamutit motoorillit atorneqartut eqqunneqarneri nalunaarsortariaqaratik, kiisalu taakku akisussaatitaanermut sillimmasertariaqassanatik angallannermut inatsisip tamaani atuutinnginnera pissutigalugu.
Eqqartuussivimmi aalajangiineq Kalaallit Nunaanni aatsitassarsiorfinnut assut sunniuteqassaaq, aalajangiinermilu tunngavigineqartut Nuna Advokatit suliamik saqqummiineranut naapertuupput. Taamaalilluni Hudson Greenland suliami tamatumani Nunatta Eqqartuussisuuneqarfianit tamakkiisumik illerneqarpoq.