Kalaallit Nunaanni suliassamik sanaartukkamilluunniit annertuumik tigusineq immini suliaavoq mikinngitsoq. Silap pissusia eqqaaginnaraanni piumasaqaatit sumiiffinni arlaqanngitsuinnarni takuneqartartut piumasaqaataasarput. Tamatuma saniatigut isiginiagassat tassaasarput Kalaallit Nunaanni inatsisit, sulisussat pissarsiarineqarsinnaassusiat, sanaartornermi atortussat allallu pissarsiarineqarsinnaassusiat.
Kalaallit Nunaanni advokateqarfinni malunnaateqarnerpaatut aamma maanna illuutinut sanaartornermilu sulianik tigusisarnermut tunngasutigut siunnersuinermi siuttunngorsimavugut. Piginnaanivut sanaartugasanik tigusisarnermut tamarmut tunngasuupput, tassa aallarniutaasumik misissuinerniit suleqatigineqarsinnaasunik qulaajaanermut, isumaqatigiissusiornermut, suliariumannittussarsiornermi inatsisit kiisalu suliffeqarfinnik kattussuilluni suleqatigiiffissualiorneq – tassunga ilanngullugu pisortat namminersortullu ingerlatseqatigiinneri (OPP).
Sanaartugassanik tigusisarnernit ilaatigut annerusumik minnerusumilluunniit pisarioqisunit qasseerpassuarni ukiorpassuarni misilittagaqalersimavugut, tamatumunngalu atatillugu sanaartornermik ingerlatsisut sanaartortitsisullu annnerpaat qasseersuit sinniisuuffigalugit sullittarsimallugit. Tamatuma saniatigut ukiut ingerlanerini sanaartugassanik tigusisarneq illuutillu pillugit isumaqatigiissaanerni eqqartuussivilersuussinernilu suliassanik ingerlatsisuusarpugut.
Illuutilerisut ilisarisimavavut kiisalu sanaartortitsisut Danmarkimeersut, nunatsinneersut nunanillu tamalaaneersut – pisortat namminersortullu – sanaartornermik suliallit, suliassanik ineriartortitsisartut, kiisalu pisortani oqartussaqarfiit assigiinngitsut sanaartornermut attuumassuteqartut attaveqarfigisavut amerlaqaat. Suliavut siammaseqalutik betoniniit paragrafinut tunngasarput, naallu sanaartukkani annerusuni aaqqiagiinnginnerit pinngitsuuinneqarsinnaaneq ajornartaraluartut taamaattoq amerlanerpassuartigut ajornartorsiutit annikitsunnguit allitinnagit akitsortinnagillu aaqqittarpavut.
Illuutinik pisinermut sanaartukkamulluunniit annertuumut tunngasuugaluarpat apeqqutaatinnagu suliassani taakkunani piginnaaneq pigaarput. Sanaartukkat suliassartaat ataasiakkaat, suliassat annertuut suliassalluunniit ilivitsut kiisalu siunnersortinut isumaqatigiissusiornerit eqqarsaatigalugit sullitavut siunnersortarpavut. Ikiuuttarpugut sanaartornermi suliassat aaqqissornerini, ajutoorfiusinnaasunik paasiniaanermi qulaajaanermilu kiisalu sanaartugassat annerusut ingerlaavartumik ineriartortinneqarnerini.
Tamatuma saniatiguttaaq illuutinik tunniussinermi tigusinermilu suliassat, nunaminertanik qinnuteqarnerit allallu suliarisarpavut. Kalaallit Nunaanni illuuteqarnermut tunngasutigut atugassarititaasut immikkut ittut kinaassutsitsinni ilaavissuupput.
Sukumiinerusumik paasisaqarumalluni attavissat tassaapput advokat Peter Schriver, advokat Charlotte Pedersen imaluunniit advokat Kista Høegh Niclasen.
